Dónderdig 2 januari waerde mit groot gebaar de Femmes de Phil, ‘t damescomité van de Philhermenie Neel gehuldigd.
Wie de hermenie op 14 januari 2010 nao 20 jaor aafsjeid noom van oos bestuurslid Berthie Franssen wiste veer al det veer nog lang neet van ‘m aaf wore. Toen al waas bekind det t’r op zien initiatief ’n heus damescomité zów waere op gericht, det neet väöl later Femmes de Phil zów gaon heite. En die Femkes sjteune ós noe al teen jaor door diek en dön.
De bandj die ze óngerein höb, is heel bezunjer. Ze kómme bie-ein om te helpe, mer ouch om zelf van de gezelligheid te kinne genete. Es t’r get te doon is, höbbe ze daodoor nooits te kort aan vrouwkrach. Boodsjappe doon, breudjes sjmere óm teen oer ’s morges? De vrouwluuj sjtaon paraat. Ze wèrke hèl, gaon veur kwaliteit en haje altied de kóste in ‘t oug Ze dinke mit ós mit en kómme mit eige ideje. Door de Femkes hoof ’t besjtuur zich euver heel get dinger minder zörg te make
Mit ’t plezeer waat ze oetsjtraole zeen de Femkes ’t visitekaertje van de hermenie. Ze zeen ós linker- en ós rechterhandj. En det al teen jaor langk.
Eder jaor pakke ze same mit ozze sentefoekser de paoseikes in, die de leje daonao verkoupe. En wie meer gekakel dan van achter oet ’t zaelke kump, des te meer eier waere dan ingepak. Ouch sjtinge de Femkes mit gluhwein, warme chocomel en wafels in de kaaj langs de route van de kerstwandeling. Ze bevrouwden de bar tiedes de concerten en ouch de nuujjaorspreuverie in de Sjter.
Ze verzorgde de catering tiedes alle repetitieweekenden en -daag van de aafgeloupe teen jaor – wo ouch ter waereld, ze sjmeerde de breudjes veur de kerstconcerten van de aafgeloupe veer jaor in de Oranjerie, in de kèrk en bie de nuujjaorspreuverie in de Sjter. Waem zaet det de Philhermenie Neel gein sjtriekers haet? Nemes sjtriek de bótter zo lekker op de breudjes es ozze eige Femmes de Phil! En waem trók de bolderkar mit water veur de hermenie oet op dae sjnikheite daag in juli 2015 tiedes de optocht van het OLS? Juus, det ware de Femkes!
Daoróm vónj de hermenie ’t gepas om de Femmes de Phil ter gelaegeheid ’n eige sjpang te gaeve, die ze mit trots kinne drage. Berthie Franssen, die noe al dertig jaor zich veur de hermenie de bein ónger de vót oetlöp, moogde names de heel groep de blome in ontvangs naeme.
Berthie bedankde names alle Femkes de hermenie veur de sjoon sjpang en sjprook de haop en ’t vertroewe oet det de Femkes nog heel lang bie de hermenie zólle sjteune. Alle leje van de hermenie feliciteerde en bedankde de Femkes. Same höbbe veer geproos op ’t nuje jaor!
