De Nieuwe Harmonie, een project van Philharmonie Maasniel

In memoriam Sjra Damen

18-09-2018

Ós ere-lid Sjra Damen oftewaal Sjra Dohmen, bienao zeventig jaor langk verbonje aan ós Neelder Philhermenie, is neet meer. Op dinsdig 11 september nome veer in de Laurentius-kèrk muzikaal afsjeid van een zeer gewaardeerd lid.

*11 mei 1933 – †4 september 2018

Sjra waas ‘ne man van weinig wäörd, mer waat t’r zag det waas raak.
Waat se dao mit deejs, det waas dien eige zaak.

Percies, aevewichtig en neet mekkelik van de wies te bringe, haaj hae exact det waat ’n hermenie zich van ‘ne goje baritonsaxofonis kós winse. Ruum ’ne halve eeuw langk, waas hae de besjpeler van de meist imposante sax van de hermenie. Dae sax det waas Sjra en Sjra det waas de sax.

Mer Sjra waas netuurlijk meer dan allein dae sax - veur zien femilie en veur Neel. Want hae waas ouch ‘ne man mit oug veur de gemeinsjap, wo bie hae veur Neel deej waat neudig waas es det neudig waas. Toet ‘t lest toe haet t’r ‘t kepelke oppe Eiermarkt piekfijn óngerhaje.  En begin jaore tachtig haet t’r de Prinsekepel van de Katers same mit angere weer mit oppe rit gezat.

Es ere-lid kós de Fiel ouch op ‘m raekene. D'r waas altied plaats veur de ker mit oos sjlaagwerk bie ‘m achterom. Hae heel waal ’n uigske in ’t zeil en d'r is nooit nieks aangekómme. Op eder konzaer, vergadering en döks zat ouch zo mer op ‘n repetitie, es ‘t mer efkes kos, sjtook hae de naas om de hook om te loestere en te kieke nao zien Neelder Philhermenie.

Mit zien eerlijke meining en oprecht commentaar
Zag t’r ós waat baeter kos mer veural ouch waat geweldig waar

Nao ’t kerskonzaer bie ’t gaon,
in ziene oughook ‘ne traon
toen zag t’r sjpontaan:
“Dae nuje dirigent, dao höb geer ‘ne goje aan.”

Sjra, bedank veur dien hulp, diene meziek, dien sjteun door diek en door dun
Diene sax blief bie os. Dao-in klink nog sjteeds dien sjtum.